Отделот за внатрешна контрола, криминалистички истраги и професионални стандарди при Министерството за внатрешни работи поднесе кривична пријава до Основното јавно обвинителство за гонење на организиран криминал и корупција – Специјализирано одделение за гонење кривични дела сторени од лица со полициски овластувања и припадници на затворската полиција против Д.К., помлад полицаец, и Б.Д., полицаец за безбедност на сообраќајот во Единицата за безбедност на сообраќајот при СВР Скопје.

Обвинетите, како службени лица – полициски службеници, на 20.04.2025 година, со намера да спречат и отежнат докажување на докази, прикриле и фалсификувале документи кои може да послужат како доказ во постапка пред суд или друг орган надлежен за водење постапка регулирана со закон. Првиот обвинет издал платен налог за прекршок и записник за сообраќаен прекршок на име на лице од Скопје за сторен прекршок. Потоа, со цел да го прикрие прекршокот на лицето, го изменил и фалсификувал платниот налог за прекршок и записникот за сообраќаен прекршок на таков начин што на вториот примерок, со пенкало, биле внесени податоци од друго лице од Скопје врз податоците пренесени со индиго од првиот примерок, иако ова лице воопшто не било контролирано од нив на наведениот ден, ниту биле сопрени за прекршок, а кое претходно им било познато како чест сторител на сообраќајни прекршоци.

Вториот обвинет, како лице задолжено за патролата, иако знаел дека првиот обвинет утврдил прекршок од лице од Скопје, а потоа на платниот налог за прекршок и записникот за сообраќаен прекршок, внел податоци на друго лице врз податоците на лицето кое го сторило сообраќајниот прекршок, му помогнал да го стори кривичното дело, со внесување на податоците на сторителот на сообраќајниот прекршок во прегледот на контролирани моторни возила и во извештајот од 20.04.2025 година за радар. Откако првиот обвинет ги фалсификувал и изменил горенаведениот налог и записник, тие ги внеле податоците на друго лице врз податоците на сторителот на прекршокот, а прегледот на контролирани моторни возила и извештајот од 20.04.2025 година за радар, така изменети, биле доставени по завршувањето на работните задачи, заедно со налогот за извршување активности во Одделението за безбедност на сообраќајот Скопје.

Одделот за внатрешна контрола, криминалистички истраги и професионални стандарди ќе покрене предлог за поведување постапка за повреда на работниот ред и дисциплина против полициските службеници и ќе изрече мерка за отстранување од работното место – суспензија до завршување на дисциплинската постапка.