Собранието на Република Северна Македонија денеска ја разгледува интерпелацијата поднесена од пратеничката група на Левица во врска со работата на министерот за внатрешни работи, Панче Тошковски. Пратеникот Сашко Јанчев, образложувајќи ја интерпелацијата пред народните избраници, истакна дека неспособноста на министерот Тошковски е доволно демонстрирана од фактот што тој дури и не помислил да понуди оставка од морални причини.

Левица ја поднесува интерпелацијата поради недостатокот на контрола врз дискотеката „Пулс“, што претставува експлицитна законска обврска на Министерството за внатрешни работи. Според Јанчев, работењето на дискотеката без исполнување на минималните услови за работа е доказ за институционалното беззаконие.

Министерството за внатрешни работи потфрлило со давањето согласност дека објектот ги исполнува условите за заштита на јавниот ред и мир, плус безбедноста на сообраќајот, како и со сопствените одговорности за проверка на работното време, гласноста и бучавата, присуството на малолетници по полноќ, служењето алкохол и употребата на наркотични супстанции. Дополнителен аргумент за одговорноста на Тошковски е фалсификуваната лиценца, која датира од неговото време како министер.

Според Левица, нејасно е и индикативно изоставувањето од истрагата на актуелната шефица на Полициската станица во Кочани, Марија Цветановска Маневска, и шефот на Одделението за криминалистички работи во Кочани, Томо Донев, кои се на функција повеќе од една година. Исто така, не се гонат ниту одговорните лица кои требало да водат евиденција за издавање на одобрение за употреба на пиротехника од Полициската станица во Кочани.

Во образложението за интерпелацијата, Левица прашува зошто Министерството за внатрешни работи, спротивно на стандардните оперативни процедури, спроведувало рација во вечерните часови без присуство на инспектор за труд, без присуство на инспектор од Управата за јавни приходи и Државниот пазарен инспекторат.