ВМРО-ДПМНЕ обвини СДСМ, Зоран Заев и Венко Филипче за злоупотреба на Агенцијата за национална безбедност (АНБ) и Агенцијата за разузнавање (АР) за прислушување на претседателот Христијан Мицкоски, новинари и бизнисмени.
Пратеникот од ВМРО-ДПМНЕ, Бране Петрушевски, на прес-конференција изјави дека од 2019 до 2024 година, безбедносните и разузнавачките служби работеле за СДСМ наместо за државата, со цел политички прогон и лов на вештерки против ВМРО-ДПМНЕ и претседателот Христијан Мицкоски, замолчување на новинари и уценување на бизнисмени.
Според Петрушевски, АНБ под водство на Виктор Димовски и Заре Милошески, како и АР под водство на Еролд Муслиу, го следеле Христијан Мицкоски, неговите движења, комуникација и активности.
Тој оцени дека следењето на политички противник, заради негова политичка елиминација со помош на државни ресурси, е крајно тоталитарен акт и метод, кој не е виден никаде во развиените западни демократии, особено не во последните 100 години.
Петрушевски постави прашања на кои очекува одговор од Јавното обвинителство:
- Кој бил одговорен за надзор на издавањето на наредбите за пресретнување (ПИМ мерки) од 2019 до 2024 година? Дали тоа е актуелниот јавен обвинител Љупчо Коцевски?
- За кого и зошто се користени пресретнатите материјали? Во која европска земја се следи лидерот на најсилната партија и новинари и медиуми? Дали се тргувало со влијание и дали се уценувани бизнисмени со добиените информации?
Тој побара од Јавното обвинителство веднаш и недвосмислено да отвори случај и да побара одговорност од Виктор Димовски, Заре Милошески и Еролд Муслиу, и од нивните политички налогодавци од врвот на СДСМ.
Петрушевски вели дека она што било практика во Македонија 5 години, и што предизвикува одвратност кај секој нормален човек, мора да биде казнето и никогаш да не се повтори.