Во Културниот центар „Биљана Беличанец“ беше промовиран „Археолошки буквар“ и „Археолошки буквар на Брајово писмо“, првите вакви литературни дела во Македонија и поширокиот регион. Автори на делата се професорите Антонио Јакимовски, Елизабета Томевска-Илиевска и Маја Јаневска.

Општина Кисела Вода и градоначалникот Орце Ѓорѓиевски ја поддржаа реализацијата на настанот, во соработка со Здружението Институт за европски образовни, социо-културни и економски политики ЕВРОПА ЗА ТЕБЕ Скопје и Државното училиште за рехабилитација на деца и младинци со оштетен вид „Димитар Влахов“ Скопје.

Овие дела се од големо образовно и културно значење бидејќи на интересен, илустративен и инклузивен начин го доближуваат археолошкото наследство до најмладите читатели, вклучително и оние со оштетен вид.

Градоначалникот Ѓорѓиевски изјави дека е посебна чест и задоволство да се промовира ова посебно и вредно издание. Тој додаде дека Општина Кисела Вода е постојано посветена на еднакви можности и права за сите, а грижата за лицата со попреченост, особено за лицата со оштетен вид, е обврска и должност.

Ѓорѓиевски истакна дека поддршката за „Археолошкиот буквар“ и неговото издание на Брајово писмо е насочена кон нудење литература која е едукативна и инспиративна, која ги запознава децата со богатото археолошко богатство на земјата и ги поттикнува да бидат горди на своето културно наследство. Тој изрази задоволство што „Археолошкиот буквар на Брајово писмо“ ќе им овозможи на децата со оштетен вид еднаков пристап до знаење, визуелно прилагодено и внимателно подготвено според нивните потреби.

Градоначалникот заклучи дека ова не е само промоција на книга, туку потврда на визија, вредности, грижа и инклузија, пример за тоа како културните и образовните аспекти можат да се комбинираат во вистинска алатка за градење на свест, идентитет и љубопитност кај младите. Тој им честиташе на авторите за нивниот труд и посветеност и им се заблагодари на сите вклучени во реализацијата на делото, кое веќе го смета за културно богатство. Тој најави дека општината ќе продолжи да поддржува проекти кои создаваат инклузивно општество и кои даваат глас и можност на секое дете да учи, да сонува и да ја гради својата иднина.