Kriva Pallanka – Zjarri që ka përfshirë fshatin Nerav në rajonin e Kriva Pallankës është ende aktiv dhe po shkakton shqetësime të mëdha. Sipas informacioneve të fundit, një sipërfaqe prej rreth njëqind hektarësh me pyll pishe është djegur.

Terreni i vështirë dhe era e fortë po e vështirësojnë ndjeshëm punën e ekipeve të shuarjes së zjarrit. Zjarri ka filluar dje rreth mesditës dhe u raportua në Njësinë Territoriale të Mbrojtjes nga Zjarri dhe Shpëtimit (TPPE) Kriva Pallanka në orën 14:00.

Për shkak të rrezikut, banorët dhe bagëtitë u evakuuan. Sipas komandantit të TPPE Kriva Pallanka, Ile Kocevski, pavarësisht përpjekjeve, shpërndarja e pakontrolluar e flakëve ka rrezikuar jetën e zjarrfikësve dhe personave të tjerë të përfshirë në shuarjen e zjarrit.

Në terren janë forca të shumta, duke përfshirë ekipe nga TPPE Kriva Pallanka dhe Rankovce, pjesëtarë të Ministrisë së Punëve të Brendshme, punonjës të Ndërmarrjes Publike “Pyjet e Maqedonisë” dhe banorë vendas. Pritet gjithashtu ardhja e pjesëtarëve të ARM-së (Ushtrisë së Republikës së Maqedonisë së Veriut) për të ndihmuar në shuarjen e zjarrit. Gjatë ditës së djeshme dhe natës, zjarri u shua aktivisht nga zjarrfikësit nga Kriva Pallanka dhe Rankovce, Njësia e Zjarrfikësve nga Tërgovishte, Serbi, ekipe nga ndërmarrja publike “Pyjet e Maqedonisë” dhe banorë lokalë.