Një zjarr i madh shpërtheu pasditen e sotme mes Katlanovës dhe Petrovacit, duke shkaktuar panik tek banorët e zonës. Drejtori i Drejtorisë së Mbrojtjes dhe Shpëtimit, Stojançe Angelov, në një deklaratë video të mbrëmjes, siguroi publikun se zjarri është lokalizuar pjesërisht dhe nuk përbën rrezik për stacionin e benzinës aty pranë.

Zjarri po lëviz në drejtim të fshatit Çiflik, dhe zjarrfikësit nga Shkupi po punojnë intensivisht për ta vënë atë nën kontroll. Angelov theksoi se një ajroplan zjarrfikës do të dërgohet në orët e para të mëngjesit dhe disa automjete të tjera do të bashkohen me operacionin.

Ai e cilësoi zjarrin si “të pakëndshëm” për shkak të vendndodhjes së tij të paarritshme, por shprehu besimin se zjarrfikësit do të arrijnë ta vënë plotësisht nën kontroll të nesërmen. Angelov u bëri thirrje qytetarëve të mos kenë frikë, pasi zjarri nuk mund të ndikojë në stacionin e benzinës, pavarësisht se është i dukshëm nga autostrada dhe shkakton ankth.