VMRO-DPMNE ka kërkuar sqarime nga Fatmir Bytyqi dhe LSDM lidhur me vjedhjen e dyshuar të dokumenteve të klasifikuara nga shtëpia e Bytyqit. Sipas VMRO-DPMNE, ngrihen pikëpyetje serioze se çfarë informacioni të klasifikuar ka pasur Bytyqi në posedim, si ka ardhur ai deri te këto dokumente dhe nëse kjo vjedhje rrezikon sigurinë e Maqedonisë së Veriut.

Valentin Manasievski, anëtar i Komitetit Qendror të VMRO-DPMNE, deklaroi se zyrtarët shtetërorë nuk kanë të drejtë të marrin sekrete shtetërore dhe dokumente të klasifikuara nga institucionet ku ndodhen dhe ku mbrohen. Ai theksoi se posedimi i dokumenteve të tilla në shtëpi nga Bytyqi është i papranueshëm.

Manasievski i bëri thirrje LSDM-së të deklarohet nëse heqja e informacionit të klasifikuar nga institucionet është praktikë dhe udhëzim partiak. Ai kërkoi nga LSDM dhe Bytyqi të informojnë menjëherë autoritetet për llojin e dokumenteve të përfshira dhe nëse vjedhja e tyre rrezikon vendin.

VMRO-DPMNE kërkon që Prokuroria Publike të nisë procedim kundër Bytyqit për këtë çështje. Sipas tyre, duhet të ketë përgjegjësi për këtë veprim.