VMRO-DPMNE akuzon opozitën, LSDM dhe BDI, për djegie të qëllimshme të deponive në Shkup, duke i cilësuar si përpjekje për të shmangur drejtësinë. Partia thekson se kjo ndodh para zgjedhjeve lokale, duke ngritur dyshime për një strukturë të organizuar pas djegieve.

Në një deklaratë, VMRO-DPMNE shprehet se “bashkimi kriminal BDI-LSDM, i paaftë të pranojë humbjen dhe kthimin e vendit në rrugën e duhur, po përdor metoda të rrezikshme dhe kriminale.” Sipas partisë, në vend të politikave, ata po përhapin tym dhe helm duke djegur deponitë e Shkupit.

Partia thekson se për vite me radhë, LSDM dhe BDI menaxhuan “Drislla” dhe “Vardariste”, duke emëruar drejtorë dhe premtuar një fabrikë për ndarjen e mbeturinave, një zonë të gjelbër dhe ajër të pastër, por gjithçka mbeti vetëm në letër. Si pasojë, sipas VMRO-DPMNE, ata lanë pas vetëm plehra, deponi ilegale dhe helmim të njerëzve.

VMRO-DPMNE thekson se kryetarët e komunave nga radhët e tyre kanë zbatuar projekte konkrete për pastrimin dhe rregullimin e hapësirave publike, krijimin e një sistemi për ndarjen e mbeturinave dhe forcimin e higjienës publike për katër vite. Ata gjithashtu përmendin një proces të rishikimit të politikës mjedisore dhe projekte të reja për modernizimin e “Drislla”, mbylljen e deponive ilegale dhe vendosjen e standardeve evropiane për menaxhimin e mbeturinave.

Partia ngre pyetje lidhur me kohën e djegieve: “Si është e mundur që deponitë filluan të ‘digjen’ pikërisht para zgjedhjeve lokale?” dhe “Si është e mundur që ‘Drislla’ ka filluar të ndotë dhe të djegë mbeturina tani?”

VMRO-DPMNE i bën thirrje Ministrisë së Punëve të Brendshme dhe Prokurorisë Publike që të zhvillojnë menjëherë një hetim të plotë për përfshirjen e strukturave të caktuara në djegien e qëllimshme të deponive.

Në përfundim, VMRO-DPMNE akuzon LSDM dhe BDI për shkaktimin e disfatave kombëtare dhe fatkeqësive mjedisore, duke thënë se “afatkeqësia e vërtetë mjedisore quhet LSDM-BDI.”