Koalicioni VLEN ka intensifikuar sulmet ndaj Bashkimit Demokratik për Integrim (BDI) dhe liderit të saj, Ali Ahmeti, duke i akuzuar për manipulime politike, korrupsion dhe përpjekje për të shpëtuar veten përmes marrëveshjeve të reja të fshehta. Sipas VLEN, koha e Ahmetit ka perënduar dhe shqiptarët nuk janë më të gatshëm të mashtrohen nga premtime boshe dhe skenarë të errët.

Në një deklaratë të sotme, VLEN thekson se BDI po përpiqet të qëndrojë në pushtet me çdo kusht, madje duke përdorur individë që, sipas tyre, kanë braktisur rrugën e ndryshimit si një mjet. Koalicioni VLEN e cilëson Arben Taravarin si pjesë të kësaj skeme të mjerueshme, duke e konsideruar atë jo si krijues, por si mjet të një politike të dëshpëruar.

Sipas VLEN, BDI ka mbajtur peng shqiptarët për dy dekada përmes “listave të zeza, shantazheve dhe manipulimeve,” ndërsa pushteti politik i Ahmetit është ndërtuar mbi frikë dhe kërcënime.

VLEN pohon se shqiptarët e kanë kuptuar se kush ua vodhi shpresën dhe kush e ktheu patriotizmin në alibi për korrupsion. Koalicioni VLEN thekson se ka ardhur për të siguruar që koha e pandëshkueshmërisë do të marrë fund dhe se ndryshimi është në rrugë e sipër dhe nuk ka kthim prapa.

Koalicioni u ka bërë thirrje të gjithë anëtarëve dhe mbështetësve të zhgënjyer të Aleancës për Shqiptarët që t’u bashkohen në “luftën për dinjitet, drejtësi dhe përfaqësim të ndershëm.”