Koalicioni VLEN ka ngritur alarmin kundër riinstalimit të monumentit të Andon Lazov-Kjosetos në Shkup, duke e cilësuar atë si një provokim serioz dhe të rrezikshëm etnik të orkestruar nga një aleancë destabilizuese. VLEN akuzon DUI-n, Levicën dhe Danela Arsovskën se po tentojnë të ndezin ndarje ndëretnike në zemër të Shkupit përmes këtij akti skandaloz.

Sipas VLEN, Kjoseto është një figurë e errët dhe e dhunshme që simbolizon urrejtjen, dhunën dhe ndarjen. Koalicioni e sheh këtë riinstalim si një akt të qëllimshëm dhe thellësisht anti-shqiptar, që vjen nga një treshe politike e rrezikshme për paqen, stabilitetin dhe kohezionin e brendshëm të vendit.

VLEN thekson se nuk do të heshtë përballë këtij turpi dhe se qytetarët nuk do t’i gëlltisin më mashtrimet e vjetra të DUI-t dhe partnerëve të saj. Ata pyesin nëse kjo është një tjetër skenar destabilizues i njohur që DUI aktivizon sa herë që është në krizë politike dhe zgjedhore, si dhe nëse ky monument është një kartë e vjetër për të shpërqendruar vëmendjen nga dështimi i qeverisë, korrupsioni dhe krimi politik.

Koalicioni pyet gjithashtu nëse vendimi për kthimin e Kjosetos është marrë në zyrat në Saraj, ku sipas tyre, ende operon një “shtab i errët” i përbashkët i Arsovskës dhe Blerim Bedzetit, dhe kush dha urdhër për këtë provokim.

VLEN pyet gjithashtu nëse DUI e ka miratuar heshtazi këtë akt për të vazhduar marrëveshjen e fshehtë me Danela Arsovskën. Ata theksojnë se në një kohë kur qyteti i Shkupit po mbytet në plehra, kur qindra familje dhe biznese nuk kanë as ujë të pijshëm dhe kur vapa kërcënon shëndetin e qytetarëve, këta të tre po merren me monumente dhe tensione ndëretnike.

VLEN kujton se monumenti i Kjosetos është ndërtuar me para publike kur DUI ishte në pushtet, dhe ministrat Bujar Osmani dhe Blerim Bedzeti e kishin mbështetur projektin.