Papa Françesku ka vdekur sot, e hënë e Pashkëve, 21 prill 2025. Lajmin e hidhur e bëri të ditur Ipeshkvi i Shkupit dhe Eparku i Strumicës-Shkupit, Monsinjor Dr. Kiro Stojanov, përmes një letre dërguar të gjitha famullive dhe komuniteteve monastike në Maqedoni.

Në letrën e tij, Monsinjor Stojanov shpreh pikëllimin e thellë për humbjen e Papës Françesku, duke theksuar në të njëjtën kohë besimin në ringjalljen dhe jetën e pasosur. Ai shprehu mirënjohjen ndaj Zotit për pontifikatin e tij, i cili, sipas tij, vazhdimisht tregoi fytyrën e mëshirshme të Atit dhe ishte një zë i veçantë për të varfrit dhe të margjinalizuarit.

Monsinjor Stojanov theksoi gjithashtu vizitën apostolike të Papës Françesku në Maqedoni në maj 2019, duke e cilësuar atë si një ngjarje që do të mbetet në kujtesë dhe e regjistruar në historinë e Republikës së Maqedonisë. Ai vlerësoi angazhimin e tij për paqen botërore, dialogun dhe vëllazërimin ndërmjet popujve, duke e parë këtë si trashëgiminë e tij për brezat e ardhshëm.

Në këto ditë zie, Monsinjor Stojanov u bëri thirrje të gjithë besimtarëve të bashkohen në lutje personale për të ndjerin Papa Françesku. Ai dekretoi që sot në orën 15:00 të bien këmbanat nga të gjitha kishat, të shoqëruara me lutjet e besimtarëve. Gjithashtu, ai urdhëroi që në ditën para funeralit të tij, në të gjitha kishat të shërbehet një Liturgji e Shenjtë për Papa Françeskun.