Pas një incidenti tragjik në Kirurgjinë Kardiake, ku një pacient humbi jetën, SDSM kërkon dorëheqjen e Ministrit të Shëndetësisë, Arben Taravari, dhe të drejtorit të Klinikës Shtetërore për Kirurgji Kardiake, Dejan Dimitrovski.

Kërkesa vjen pas vdekjes së pacientit, Toni Angelovski, 59 vjeç, i cili, sipas familjarëve, nuk iu nënshtrua operacionit urgjent për shkak të mungesës së dhomave të operacionit të lira dhe mungesës së materialeve të nevojshme.

Belkisa Zekiri, anëtare e Bordit Ekzekutiv të SDSM, deklaroi se pacienti vdiq për shkak të mosfunksionimit të sistemit shëndetësor, i cili nuk mundi të ofrojë ndërhyrjen e nevojshme emergjente.

Inspektoriati Shtetëror Shëndetësor dhe Sanitar konfirmoi se dhoma e angiografisë në Kirurgjinë Kardiake kishte një muaj që nuk funksiononte dhe se mungonin stent graftet. Zekiri pyeti se si një spital shtetëror, me rëndësi strategjike, nuk mund të ketë kushte bazë për të shpëtuar jetë njerëzish, duke shtuar se qytetarët paguajnë sigurimin shëndetësor për të marrë trajtim, jo për të parë jetën e tyre në fije të perit për shkak të paaftësisë dhe neglizhencës së dikujt.

Familja e të ndjerit akuzoi se klinika u tha se nuk kishte dhoma operacioni të lira dhe se u referuan në spitale private, ku u thanë se kuota ishte e plotë deri në qershor.

Nga ana tjetër, Klinika për Kirurgji Kardiake pohon se pacienti u trajtua menjëherë dhe mori terapinë e nevojshme, duke shtuar se gjendja e tij u stabilizua. Pas shqyrtimit të të gjitha gjetjeve, konsorciumi mjekësor vendosi se nëse do të kryhej trajtim kirurgjik i hapur, shanset e pacientit për mbijetesë do të ishin jashtëzakonisht të vogla, gjë që iu shpjegua familjes. Klinika konfirmoi se dhoma e dytë e operacionit nuk ka funksionuar për më shumë se një muaj për shkak të instalimit të një pajisjeje të re, e cila kërkon gjithashtu riadaptimin e hapësirës.

Ministri i Shëndetësisë, Arben Taravari, deklaroi se do të ketë përgjegjësi nëse konstatohen lëshime.