Shkup – Shporta e sindikatës është shtrenjtuar me mbi 1200 denarë vetëm brenda një muaji, duke theksuar dështimin e politikave ekonomike të qeverisë VMRO-DPMNE dhe ZNAM. Kështu deklaroi Martin Kostovski, sekretar organizativ i LSDM-së, duke iu referuar të dhënave nga Federata e Sindikatave.

Kostovski theksoi se një familje katër anëtarëshe ka nevojë për gati 63,000 denarë në muaj vetëm për të mbijetuar.

Kostot për ushqim dhe pije janë rritur me 954 denarë. Ai shtoi se ushqimet bazë po bëhen luks dhe pagat nuk po lëvizin, duke theksuar se nevojiten tre paga minimale për të mbijetuar muajin.

“Jeta po shtrenjtohet, pagat janë në vendnumëro dhe nuk ka masa nga qeveria,” tha Kostovski. Ai kritikoi kryeministrin Mickoski për pritjen e analizave dhe mosdijen se sa janë rritur çmimet, ndërkohë që qytetarët po fundosen në varfëri. Ai shtoi se njerëzit po mbijetojnë me borxhe dhe sakrifica.

Kostovski u shpreh se ministrat e qeverisë duket se nuk e dinë sa kushton të mbushësh një frigorifer dhe se zyrtarët e VMRO-DPMNE jetojnë jashtë realitetit. Ai solli si shembull një kontratë milionëshe të lidhur nga SOZR për pjata luksoze si kallamarë, butakë dhe salmon.

Ai e cilësoi atë që po bën qeveria si vjedhje të popullit dhe bëri thirrje për rritje të pagave dhe masa për uljen e çmimeve, duke përfshirë rritjen e pagës minimale në 500 euro, masa për paga më të larta në sektorin publik dhe privat, si dhe heqjen e TVSH-së në ushqim.

Kostovski përfundoi duke theksuar se LSDM është me qytetarët dhe do të vazhdojë të luftojë për paga më të larta dhe një jetë dinjitoze.