Një aksident i rëndë trafiku ndodhi mbrëmë në Gostivar, ku një 18-vjeçar humbi jetën. Sipas informacioneve nga Ministria e Punëve të Brendshme, incidenti ndodhi në orën 01:40 në rrugën “Ilindenska”.

Një automjet “BMW” me targa zvicerane, i drejtuar nga I.M.(38) nga fshati Balindol i Gostivarit, u përplas me një motoçikletë me targa të Gostivarit, të drejtuar nga A.B.(18) nga Gostivari.

Për fat të keq, motoçiklisti A.B. ndërroi jetë në vendngjarje. Ekipi mjekësor nga Shërbimi i Ndihmës së Shpejtë konfirmoi vdekjen e tij.

Shoferi i automjetit, I.M., është arrestuar nga policia. Pas urdhëresës së prokurorit publik, një ekip inspektimi nga Departamenti Policor i Gostivarit kreu një hetim në vendngjarje.

Pas kompletimit të dokumentacionit të plotë, kundër shoferit I.M. do të ngrihet një kallëzim penal për shkaktimin e aksidentit me pasojë vdekjen.