Vesna Bendevska, nënkryetare e Lëvizjes ZNAM – Për Maqedoninë tonë, ka kritikuar ashpër LSDM-në, duke e krahasuar selinë e tyre me muze arkeologjik të braktisur. Ajo i ka bërë thirrje LSDM-së të vendosë roje sigurie para selive të tyre komunale, jo për arsye sigurie, por për të menaxhuar “kaosin” nga turma që supozohet se janë krijuar si pasojë e kthimit masiv të anëtarëve të ZNAM-it në LSDM.

Bendevska ka theksuar se LSDM po hyn në një fazë të vetëmashtrimit politik, të njohur si faza e “fantazisë parazgjedhore”, dhe ka kërkuar sinkronizim të marketingut politik me realitetin në terren. Ajo ka pyetur se nëse LSDM pretendon se anëtarët e ZNAM-it po kthehen, atëherë pse të gjitha selitë e tyre në të gjithë vendin duken si muze të arkeologjisë politike – të mbyllura, të pluhurosura dhe të harruara.

Duke publikuar foto të selive të LSDM-së në disa qytete, Bendevska ka pohuar se nuk ka pasur aktivitet për muaj të tërë, ato janë të mbushura me bar dhe të palara.

Ajo ka theksuar se anëtarësia e ZNAM-it është stabile, e motivuar dhe e vendosur për të ndërtuar një entitet të ri politik, i cili, ndryshe nga LSDM, do të funksionojë ndershmërisht dhe efikasht. ZNAM, sipas saj, është këtu me njerëz me ide dhe vizion, duke luftuar për ndryshime, jo për karrige, dhe për një sistem që funksionon ekskluzivisht në interes të qytetarëve.

Në lidhje me koalicionin qeveritar, pas njoftimit të kryeministrit Mickovski se Taravari po largohet nga qeveria, Bendevska ka deklaruar se Lëvizja ZNAM është kundër të qëndruarit në të njëjtën qeveri me një entitet që negocion me BDI-në e pareformuar. Ajo ka theksuar nevojën urgjente për de-BDI-zimin e shoqërisë, duke sqaruar se kjo nuk nënkupton albanofobi, por kundërshtim ndaj një sistemi të qeverisjes së korruptuar dhe kriminale.

Sa i përket komunikimit me deputetët nga Aleanca e Taravarit, Bendevska është përgjigjur se deputetët e Aleancës për Shqiptarët nuk kanë marrë pjesë në koordinim dhe do të ishte e papërgjegjshme të pretendonte se çfarë do të ndodhë me ta.