Në Kuvendin e Republikës së Maqedonisë së Veriut, sot u mbajt seanca konstituive e Grupit Parlamentar Ndër-Partiak për Monitorimin e Zbatimit të Detyrimeve nga Procesi i Berlinit dhe Agjendës së Reformave nga Plani i Rritjes.

Ky grup, iniciativa e të cilit u dorëzua në tetor të vitit të kaluar dhe u pranua nga të gjitha partitë politike, synon të mbikëqyrë dhe mbështesë zbatimin e reformave kyçe që rrjedhin nga Procesi i Berlinit dhe Plani i Rritjes, të cilat janë prioritete strategjike për vendin.

Antonio Milloshoski, nënkryetar i Kuvendit, u zgjodh unanimisht kryetar i grupit, me propozim të Nikolla Micevski, koordinator i VMRO-DPMNE. Milloshoski falënderoi për besimin dhe u zotua për aktivitete të shumta të grupit. Ai theksoi rëndësinë e formimit të këtij grupi për të siguruar mbikëqyrjen parlamentare dhe mbështetjen në zbatimin e detyrimeve reformuese.

Për të rritur efektivitetin e grupit, Milloshoski propozoi zgjerimin e anëtarësisë përtej 29 deputetëve aktualë, duke përfshirë edhe organizatat joqeveritare.

Grupi Parlamentar do të fokusohet në:

• Shkallën e realizimit të detyrimeve që lidhen me Tregun e Përbashkët Rajonal.
• Seanca publike dhe dëgjimore mbikëqyrëse me përfaqësues të pushtetit ekzekutiv, në lidhje me projektet që janë pjesë e qëllimeve të Procesit të Berlinit.
• Përfaqësimin e Kuvendit në ngjarje rajonale dhe ndërkombëtare të organizuara në kuadër të Procesit të Berlinit.
• Aktivitete të tjera që lidhen me Planin e Rritjes të Komisionit Evropian.

Në Procesin e Berlinit marrin pjesë nëntë shtete anëtare të BE-së, si dhe Britania e Madhe. Që nga një vit më parë, përveç qeverive, janë përfshirë edhe parlamentet. Aktualisht, Gjermania kryeson Procesin e Berlinit, por nga qershori kryesimi do të kalojë në Britaninë e Madhe.