Negotinë – Bashkimi Social Demokrat i Maqedonisë (SDSM) ka zbuluar një skandal të ri në lidhje me shpenzimet e pajustifikuara të parasë publike në komunën e Negotinës, ku shuma astronomike janë paguar për ndërtimin e një tregu. Sipas informacioneve të publikuara, komuna e Negotinës ka lidhur një kontratë me kompaninë MASTEF DOOEL, e konsideruar si favorite e VMRO-DPMNE, në vlerë totale prej rreth 420,000 euro për ndërtimin e një tregu, i klasifikuar si ‘pajisje urbane’.

SDSM thekson se pjesa më e dyshimtë e kontratës ka të bëjë me punimet e çatisë. Për vetëm një metër katror panel sandwich, komuna ka paguar 10,000 denarë, ndërkohë që çmimi real i tregut, përfshirë punën, nuk e kalon shumën prej 2,000 denarësh.

Sipas SDSM, kjo diferencë prej 8,000 denarësh – ose rreth 130 euro – për çdo metër katror, për 440 metra katrorë, do të thotë 60,000 euro më shumë se vlera reale vetëm për çatinë. Kjo situatë ngre dyshime serioze për përvetësim të organizuar të parasë publike.

Partia thekson se çmimet pesë herë më të larta për një artikull të vetëm në një tender, përbëjnë një skandal të madh.

SDSM kërkon hetim të menjëhershëm dhe përgjegjësi për këtë rast. Ata i bëjnë thirrje Prokurorisë Publike dhe Komisionit Shtetëror për Parandalimin e Korrupsionit që të veprojnë menjëherë në përputhje me kompetencat e tyre dhe të hetojnë këtë rast.