Shkup – LSDM akuzon qeverinë e udhëhequr nga DPMNE, ZNAM dhe VLEN si më të paaftën dhe kaotike që Maqedonia ka pasur ndonjëherë. Sipas tyre, institucionet po kolapsojnë ndërsa partitë në pushtet janë të zënë me grindje të brendshme.

Sipas LSDM, sistemi është në prag të kolapsit, dhe qeveria funksionon si një kartel i çorganizuar, më e fokusuar në përfitime personale sesa në zgjidhjen e problemeve të qytetarëve. Ata pretendojnë se qytetarët po shohin grindje partiake, skandale dhe luftëra të heshtura për tenderë dhe funksione, në vend të punës dhe rezultateve.

LSDM thekson se shëndetësia po dështon, ekonomia është në rënie të lirë dhe infrastruktura ka ngecur. Pagat për mijëra punonjës në sektorin publik janë të papaguara dhe nuk ka projekte të reja.

Sipas LSDM, qeveria nuk punon për popullin, por vetëm për veten e saj. Paratë, sipas tyre, në vend që të shkojnë për qytetarët dhe punëtorët, shpenzohen në fruta luksoze si papaja dhe mango, hotele luksoze, avionë privatë dhe udhëtime me delegacione shtetërore si udhëtime turistike.

“Kjo nuk është një Qeveri që punon për qytetarët – ky është kaos i organizuar në dëm të shtetit. Kjo qeveri nuk ka kapacitet, as plan, as vizion. Gjithçka që shohim janë grindje, skandale dhe paaftësi,” thotë LSDM.