Shkup – Opozita e LSDM-së ka akuzuar ashpër qeverinë e udhëhequr nga VMRO-DPMNE për një “goditje të rëndë dhe të turpshme ndaj punëtorëve kulturorë”, pikërisht para festës së madhe të krishterë të Pashkëve.

Sipas LSDM-së, në vend të rritjes së pagave siç ishte rënë dakord në Marrëveshjen Kolektive të vitit 2021, punëtorët kulturorë i pritën festat e Pashkëve pa asnjë denar në llogaritë e tyre.

“Korrigjimi i të ardhurave duhej të fillonte me pagën e muajit mars, sipas Marrëveshjes Kolektive. Në vend të kësaj, punëtorët kulturorë u injoruan dhe deklarata manipulative erdhën nga Ministria e Kulturës – se nuk punuan mjaftueshëm, se nuk e meritonin pagën, se pagat ishin ‘të larta’. Deklarata të tilla janë fyese dhe diskredituese,” thotë LSDM.

Partia thekson se ky qëndrim është dëshmi e mosinteresimit të plotë të qeverisë ndaj njerëzve që, siç deklarojnë ata, mbajnë kulturën mbi supet e tyre.

“Pse nuk respektohet marrëveshja kolektive? Pse punëtorët kulturorë fyehen nga institucioni që duhet t’i mbrojë? Nëse Ljutkov nuk është në gjendje të përmbushë detyrimet e tij, le të japë dorëheqjen,” thuhet në deklaratën nga LSDM.

Ata kujtojnë se punëtorët kulturorë nuk janë statistika në shoqëri, por bartës kyç të vlerave dhe traditave dhe meritojnë trajtim me dinjitet, jo heshtje dhe injorancë.