Në Zonën e Zhvillimit Teknologjik-Industrial (ZZHTI) Shkup ka filluar zyrtarisht ndërtimi i fabrikës së kompanisë turke “Şahterm”, një prodhues i ngrohësve dhe rezistorëve për pajisje shtëpiake dhe elektrike.

Në fazën e parë, investimi do të jetë 25 milionë euro dhe do të hapë 200 vende të reja pune. Është planifikuar një investim total prej 50 milionë eurosh dhe mbi 500 të punësuar në fazën e dytë.

Kryeministri Hristijan Mickoski, i pranishëm në vendosjen e gurthemelit, theksoi se ky investim përfaqëson një hap të rëndësishëm drejt zhvillimit ekonomik dhe përparimit industrial të vendit.

Sipas Mickoskit, Prodhimi industrial në mars të vitit 2025 u rrit me 5.2 për qind në nivel vjetor. Investimet e huaja direkte për vitin 2024 arritën në 1.255 miliardë euro, duke e bërë Maqedoninë vendin me më shumë investime të huaja për frymë banori në Evropë.

Inflacioni në mars është nën 3 për qind – 2.7, dhe në prill 2.6 për qind. Rrogat po rriten nga 9 në 10 për qind në nivel vjetor, dhe aktiviteti i kredisë në tremujorin e parë u rrit me 13 për qind – që është gjashtë herë më shumë se mesatarja në Bashkimin Evropian.

Fabrika “Şahterm” do të shtrihet në një sipërfaqe prej mbi 13,000 metra katrorë dhe do të përfshijë gjithashtu një qendër kërkimore dhe zhvillimore. Kjo do të jetë fabrika e parë e prodhimit të kompanisë jashtë Turqisë.

Ambasadori turk në vend, Fatih Ulusoy, shprehu kënaqësinë me fillimin e investimit, duke theksuar se “Şahterm” është një kompani që punon me markat më të mëdha në botë në industri.

Ai theksoi se tregtia midis dy vendeve është afruar në 1 miliard dollarë, me një qëllim të përbashkët për ta rritur atë në 2 miliardë dollarë. Pritet që negociatat për përditësimin e Marrëveshjes së Tregtisë së Lirë nga viti 1999 të fillojnë së shpejti.

Presidenti dhe themeluesi i “Şahterm”, Faruk Şahin, prezantoi kompaninë dhe kapacitetet e saj globale. Ai theksoi se ata kanë më shumë se 40 vjet përvojë në projektimin dhe prodhimin e sistemeve të ngrohjes për pajisje shtëpiake dhe eksportojnë 60 për qind të prodhimit të tyre. Aktualisht, ata janë ndër pesë kompanitë kryesore në botë në këtë aktivitet dhe punojnë me marka të tilla si ‘Whirlpool’, ‘Amica’, ‘Gorenje’, ‘Beko’ dhe ‘Candy’.