Shkup – Kryeministri Hristijan Mickoski deklaroi se qeveria po punon vazhdimisht për të rritur pagat e qytetarëve, duke theksuar se edhe paga aktuale mesatare prej 45,800 denarësh nuk është e mjaftueshme.

Duke iu përgjigjur pyetjes së një gazetari në lidhje me rritjen e pagave në vend, Mickoski tha se rritja e pagës mesatare, si bruto ashtu edhe neto, me mbi 11% përgënjeshtron pretendimet e opozitës se pagat nuk po rriten ose po ngecin.

“Fakti që paga mesatare po rritet me më shumë se 11% është mohim për të gjithë ata ‘nekrofilë’ brenda opozitës,” tha Mickoski, duke shtuar se të dhënat e fundit janë dëshmi se opozita spekulon, trillon dhe krijon të pavërteta.

Mickoski theksoi se qëllimi i qeverisë është të përmbushë pritshmëritë e qytetarëve, duke ofruar të ardhura edhe më të larta për punëtorët. “Normalisht, ne si Qeveri vazhdojmë të punojmë për të ardhura edhe më të larta për punëtorët, sepse ky është qëllimi ynë, të ofrojmë atë që qytetarët presin nga ne,” përfundoi Mickoski.