Qeveria e Republikës së Maqedonisë së Veriut ka miratuar Draft Programin për mbështetje financiare të projekteve në fushën e rinisë, si dhe ndryshimet në Ligjin për Vetëqeverisjen Lokale.

Sipas njoftimit nga shërbimi për shtyp i qeverisë, vendimet u morën në seancën e 77-të të qeverisë, me qëllim përmirësimin e jetës së qytetarëve.

Ministria e Politikës Sociale, Demografisë dhe Rinisë do të ndajë grante për organizatat rinore në vlerë deri në 300,000 denarë për projekt. Projektet dhe aplikacionet duhet të fokusohen në forcimin e ndikimit të të rinjve në proceset e vendimmarrjes, njohjen e punës rinore, pajisjen e të rinjve me njohuri për media dhe shkrim-leximin digjital, rritjen e vetëdijes për dhunën dhe krijimin e zgjidhjeve inovative për uljen e papunësisë.

Qeveria ka njoftuar se një thirrje publike do të publikohet për të siguruar transparencë. Aplikacionet dhe projektet do të shqyrtohen nga përfaqësues të ministrisë dhe Sekretariatit të Përgjithshëm, ndërsa shpërndarja e fondeve do të bëhet në përputhje me rregulloret.

Për më tepër, u miratua Projektligji për ndryshimin e Ligjit për Vetëqeverisjen Lokale. Qeveria thekson se këto ndryshime, pas miratimit nga Kuvendi, do të sjellin përmirësime të konsiderueshme në funksionimin e komunave, duke rritur transparencën, pjesëmarrjen e qytetarëve dhe efikasitetin administrativ.