Qeveria e udhëhequr nga koalicioni “Vredi” ka rritur pagën minimale për punonjësit e Postës së Maqedonisë së Veriut në 24,400 denarë, një rritje prej 1,800 denarësh, në përputhje me vendimin e Qeverisë. Sipas koalicionit, kjo rritje është një hap i rëndësishëm për të përmirësuar kushtet e punës dhe për të rivendosur dinjitetin e punëtorëve.

Nën udhëheqjen e Drejtorit Orhan Kurtishi, është arritur një marrëveshje me përfaqësuesit e sindikatës për të zbatuar këtë rritje.

“Vredi” thekson se kjo është vetëm fillimi i një sërë vendimesh që synojnë transformimin rrënjësor të sektorit publik dhe përmirësimin e standardeve të jetesës për të gjithë qytetarët.

Rritjet do të vazhdojnë gradualisht në muajt e ardhshëm, sipas planit afatmesëm të Qeverisë për zhvillim të qëndrueshëm ekonomik. Kjo tregon angazhimin e qeverisë për të mbështetur punëtorët dhe për të siguruar kushte më të mira jetese për ta.