Një fëmijë tetë vjeçar u sulmua nga një qen endacak në sheshin e Manastirit. Pas ndihmës mjekësore të marrë në spital, fëmija është liruar për trajtim në shtëpi.

Komuna e Manastirit ka reaguar pas incidentit, duke shprehur keqardhje për ngjarjen e ndodhur në një ambient publik në Sheshin Magnolia. Fëmija ka marrë një lëndim në ballë.

Fëmija është trajtuar në Klinikën e Kirurgjisë Maksillo-Faciale në Spitalin Klinik të Manastirit, ku ka marrë ndihmën e nevojshme mjekësore.

Kryetari i Komunës së Manastirit, Toni Konjanovski, ka kontaktuar prindërit e fëmijës. Ai është informuar se fëmija është mirë, por ende ndjen frikë pas ngjarjes. Konjanovski i ka uruar shërim të shpejtë fëmijës dhe ka theksuar se komuna po punon intensivisht për zgjidhjen e problemit të qenve endacakë.

Incidenti nxjerr në pah nevojën për një zgjidhje sistematike dhe afatgjate të problemit të qenve endacakë. Streha “Hachiko”, e cila filloi të funksionojë në tetor 2024, është një hap i rëndësishëm në krijimin e një qasjeje të organizuar për trajtimin e kësaj çështjeje. Komuna e Manastirit thekson se puna e strehës duhet të mbështetet.