Shkup – Qarkullimi në rrugët shtetërore të Maqedonisë zhvillohet normalisht, pavarësisht nga kushtet e lagështisë që mund të hasen në disa zona.

Intensiteti i trafikut ka shënuar rritje, veçanërisht në rrugët jashtë zonave urbane, për shkak të sezonit të pushimeve verore.

Në pikat kufitare, në anën maqedonase, nuk raportohen vonesa për hyrje dhe dalje nga vendi.

AMSM rekomandon që shoferët të përshtatin shpejtësinë e lëvizjes, të respektojnë sinjalistikën rrugore dhe të jenë të kujdesshëm në rrugët që kalojnë nëpër lugina, gryka dhe pranë lumenjve, ku ekziston mundësia e rrëshqitjeve të dheut. Kjo vlen veçanërisht për akset Katlanovë – Veles, Mavrovë – Dibër – Strugë, Vinicë – Berovë dhe Koçan – Dellçevë.

Nga 1 korriku deri më 31 gusht, është në fuqi regjimi veror i qarkullimit në rrugët shtetërore, i cili ndalon lëvizjen e automjeteve të rënda me peshë mbi 15 tonë gjatë fundjavave dhe ditëve me temperatura ekstreme.

Orari i kufizimeve është si më poshtë:

• E premte nga ora 17:00 deri në 22:00,
• E shtunë nga ora 09:00 deri në 18:00 dhe
• E diel nga ora 09:00 deri në 22:00.

Në ditët me temperatura shumë të larta, të përcaktuara nga Ministria e Shëndetësisë, kufizimi do të zbatohet edhe nga e hëna në të enjte, nga ora 11:00 deri në 17:00.

Përjashtime nga kufizimi bëjnë automjetet që transportojnë kafshë, lule, ndihma humanitare, grurë dhe drithëra, mallra të prishshme, naftë dhe produkte të naftës, materiale të rrezikshme dhe automjete që transportojnë për kompani që kanë kontrata për zbatimin e projekteve në rrugët shtetërore me NP për Rrugë Shtetërore.