Lidhja Social Demokrate e Maqedonisë (LSDM) ka shprehur kundërshtimin e fortë ndaj propozimit për zgjedhjen e Trajko Sllaveskit si Guvernator të Bankës Popullore. Sipas LSDM-së, kjo lëvizje do të thotë “varrosja e institucionit të fundit të pavarur” në vend.

LSDM e konsideron të paprecedentë lejimin e një “pioni klasik partiak” të udhëheqë këtë institucion të rëndësishëm financiar, ku tradicionalisht kanë qenë ekspertë të pavarur në pozitën e guvernatorit.

Sipas LSDM-së, Trajko Sllaveski është personi për të cilin paga minimale prej 9,000 denarësh (afërsisht 150 euro) është “shumë para”. Ata e shohin atë si “kampionin e Mickoskit kundër interesave të punëtorëve”. LSDM thekson se ai njihet si “armiku më i madh i idesë së rritjes së pagës minimale”, si dhe “armik i llogaritjes së saktë të shportës së konsumatorit për një familje prej katër anëtarësh”. Ata e akuzojnë atë se, gjatë kohës që menaxhonte financat e vendit, ka “shpenzuar dhe ka futur shtetin në borxhe të mëdha”.

LSDM e cilëson Sllaveskin si “zyrtar të lartë të VMRO-DPMNE-së” dhe “bashkëpunëtor të ngushtë të Nikolla Gruevskit”, si dhe “ministër në qeverinë e tij që poshtëroi punëtorët dhe i trajtoi si fuqi punëtore të lirë”.

Si kryetar i Këshillit të Qytetit të Shkupit, LSDM thotë se Sllaveski do të mbahet mend si personi që “shkatërroi qytetin”.

LSDM pretendon se Sllaveski ka zhvilluar “betejat e Mickoskit me Arsovskën” pasi “dështuan marrëveshjet e tyre të biznesit”.

LSDM shpreh zhgënjimin e thellë me “qëndrimin servil të Presidentes Siljanovska”, duke e akuzuar se “nuk ka qenë kurrë e pavarur dhe as nuk do të marrë një vendim të pavarur në të ardhmen”. Ata e konsiderojnë atë, si “të gjithë presidentët e mëparshëm të zgjedhur nga VMRO-DPMNE”, si të pranishëm vetëm për të “përmbushur urdhërat e partisë”. LSDM beson se ajo “kishte mundësinë të qëndronte pas zgjedhjes së saj, të promovonte një person të pavarur dhe profesional, por vendosi të ulë kokën para Mickoskit”.