Shkup – LSDM akuzon Prokurorinë Publike se po minimizon përgjegjësinë e zyrtarëve dhe institucioneve aktuale lidhur me tragjedinë në Koçan.

Partia opozitare thekson se në vend që të përcaktohet përgjegjësia institucionale dhe të mbahen përgjegjës drejtorët e Inspektoratit Shtetëror të Tregut, Drejtorisë së të Hyrave Publike (DHP) dhe organeve të tjera përkatëse që kishin detyrimin të veprojnë, fokusi po zhvendoset në raste individuale dhe grupe margjinale. Sipas LSDM, po shmanget thelbi – pse dhe si një kompani importoi dhe shiti piroteknikë të rrezikshme për muaj të tërë pa leje, dhe kush e lejoi këtë.

LSDM kritikon faktin se në vend të hapjes së hetimeve të veçanta për çdo aspekt të rastit – për importin ilegal, mbikëqyrjen institucionale, reagimin e policisë dhe lëshimet specifike të diskos, Prokuroria Publike i ka paketuar të gjitha në një rast të vetëm. Kjo, sipas partisë, rrezikon zgjatjen e procedurës për vite, madje dekada, duke e bërë drejtësinë të paarritshme.

Një tjetër shqetësim i ngritur nga LSDM është vendimi për lirimin e oficerëve të policisë dhe zyrtarëve policorë të ndaluar, të cilët ishin përgjegjës natën fatale, me masa paraprake. Sipas LSDM, shqetësuese është veçanërisht fakti që dy prej tyre u kapën rrugës për në kufirin me Bullgarinë, gjë që ngre dyshime për arratisje të mundshme dhe fshehje të fajit.

LSDM thekson se pa një hetim të plotë dhe të paanshëm, pa përgjegjësi për institucionet dhe mbajtësit e funksioneve që dështuan, nuk do të ketë drejtësi të vërtetë për viktimat dhe familjet e tyre. Partia shton se qytetarët po vëzhgojnë dhe presin me të drejtë drejtësi.