Prokurorët që po hetojnë zjarrin në diskotekën “Puls” në Koçan u takuan sot me familjet e viktimave për t’i informuar ata mbi ecurinë e hetimeve.

Gjatë takimit, prokurorët u përgjigjën të gjitha pyetjeve dhe dilemave të familjarëve të viktimave dhe i siguruan ata se hetimi është i plotë dhe po shqyrtohen të gjitha aspektet e mundshme të përgjegjësisë për ngjarjen tragjike. Kështu njoftoi Prokuroria pas takimit.

Familjarët u informuan gjithashtu për dinamikën e seancave të ardhshme dëgjimore të personave të lënduar, si faza e ardhshme e procesit hetimor.

Gjithashtu, u bë thirrje publike për qytetarët që kanë dëshmi ose prova për funksionimin e diskotekës “Puls” që t’i ndajnë ato me hetuesit.