Koalicioni VLEN akuzon Ministrinë e Punëve të Jashtme, gjatë kohës kur drejtohej nga Bujar Osmani, për shpërdorime të mëdha gjatë organizimit të Këshillit Ministror të OSBE-së në Shkup në dhjetor 2023. Sipas dokumenteve të siguruara nga VLEN, bëhet fjalë për prokurime të dyshimta, të paligjshme dhe me kosto astronomike.
Një nga kontratat më të diskutueshme është ajo për qiranë e automjeteve, me një vlerë prej 56,640,000 denarë për një konferencë dy-ditore. VLEN thekson se në këtë kontratë mungon një mekanizëm i kontrollit të brendshëm, i cili do të verifikonte numrin e automjeteve të përdorura, llojin e automjeteve dhe kohëzgjatjen e angazhimit të tyre.
Sipas VLEN, çmimet e qirasë së automjeteve ishin si më poshtë:
- Automjet VIP: 29,000 denarë në ditë (pa TVSH)
- Automjet i mesëm: 23,000 denarë në ditë (pa TVSH)
- Minivan 8+1: 19,200 denarë në ditë (pa TVSH)
VLEN ngre pikëpyetje mbi këto çmime, duke i krahasuar me një kontratë tjetër të lidhur një muaj më parë me të njëjtin operator për nevojat e rregullta të Ministrisë. Në këtë kontratë, një automjet VIP kushtonte vetëm 9,500 denarë me shofer, tre herë më lirë se çmimi i miratuar nga Bujar Osmani për konferencën.
Koalicioni VLEN e cilëson këtë si një shpërdorim skandaloz, duke theksuar se shteti ka paguar tre herë më shumë për të njëjtat automjete, nga e njëjta kompani dhe në të njëjtën periudhë kohore.
VLEN thekson se Zyra e Auditimit Shtetëror ka vërejtur tashmë parregullsi serioze në funksionimin e Ministrisë së Punëve të Jashtme gjatë kohës së Bujar Osmanit, dhe rastet janë dorëzuar në Prokurorinë Publike.
VLEN i drejton një sërë pyetjesh Bujar Osmanit:
- Kush konfirmoi numrin e automjeteve dhe zbatimin e kontratës?
- Pse çmimet ishin tre herë më të larta për të njëjtat shërbime dhe nga i njëjti operator?
- Kush përfitoi nga këto prokurime kriminale?
VLEN kërkon nga Bujar Osmani shpjegime të detajuara dhe thekson se mënyra e tij e punës është një shembull klasik i korrupsionit politik, shpërdorimit dhe shpenzimit të parave të shtetit për interesa private.