Manastir do të jetë nikoqir i ndeshjes ndërkombëtare midis Maqedonisë dhe Italisë për futbollistë nën 21 vjeç, e cila do të zhvillohet më 9 shtator. Presidenti i Federatës së Futbollit të Maqedonisë (FFM), Masar Omeragić, së bashku me përfaqësues të FFM-së, vizitoi sot Manastirin për të inspektuar gjendjen e stadiumit “Petar Milloshevski”.

Qëllimi i vizitës ishte të vlerësohej nëse stadiumi plotëson kushtet e UEFA-s për mbajtjen e një ndeshjeje ndërkombëtare. Për të zhvilluar një ndeshje të tillë ndërkombëtare, nevojitet kryerja e përgatitjeve dhe plotësimi i kritereve për marrjen e një licence nga një komision i UEFA-s.

Gjatë vizitës, Omeragić u takua me kryetarin e komunës së Manastirit, Toni Konjanovski, për të diskutuar rreth përgatitjeve të nevojshme dhe ndërmarrjen e obligimeve nga komuna dhe FFM, në mënyrë që Manastiri të prezantohet në dritën më të mirë.

Pas inspektimit në terren, presidenti i FFM vizitoi komunën e Manastirit, ku ai dhe kryetari biseduan për sukseset në sport të ekipeve të Manastirit, sukseset në sportin shkollor dhe kushtet për zhvillimin e sportit shkollor, në të cilin komuna investon vazhdimisht.

Kryetari theksoi se në thirrjen e fundit publike nga Qeveria, komuna ka aplikuar për ndërtimin e 3 sallave sportive shkollore dhe 9 fushave sportive në shkolla. Si shenjë e bashkëpunimit të mirë, Omeragić i dhuroi kryetarit Konjanovski një fanellë futbolli përfaqësuese me emrin e tij, me numrin 9.