Partia e Levica ka paraqitur një amendament në Ligjin për Media, duke synuar trajtim të barabartë për stacionet radiofonike dhe lehtësim për portalet. Deputeti dhe zëdhënësi i Levica-s, Amar Mecinoviq, ka propozuar që stacionet radiofonike të trajtohen si stacionet televizive, ndërsa portalet të kenë vetëm një të punësuar.

Mecinoviq theksoi se kjo ndërhyrje ligjore është e nevojshme duke marrë parasysh vlerësimet e dobëta që Maqedonia ka marrë për hapësirën mediatike në dekadën e fundit, dhe nevojën për të mbrojtur akterët e mediave.

Amendamenti i propozuar synon të trajtojë specifikisht nevojat e portaleve që fokusohen në tema të veçanta, siç janë sporti, automjetet ose fetare, të cilat sipas Mecinoviq nuk kërkojnë një numër të madh të punësuarish. Ai beson se me vetëm një të punësuar, këto portale mund të funksionojnë brenda kornizës ligjore dhe të mbrohen.

Një tjetër pikë e rëndësishme e amendamentit ka të bëjë me stacionet radiofonike. Partia e Levica argumenton se është e padrejtë që stacionet radiofonike, të cilat janë të regjistruara si transmetues si stacionet televizive, të duhet të regjistrojnë një entitet të veçantë ligjor për të kryer këtë aktivitet. Sipas tyre, kjo duket si diskriminim i shkaktuar nga lobimi i fortë i televizioneve.