Në ditët në vijim, vendi ynë pritet të përjetojë mot të ndryshueshëm, pas një dite të ngrohtë dhe me diell. Sipas Shërbimit Hidrometeorologjik, ditën e sotme do të mbizotërojë mot i ngrohtë dhe me diell, me vranësira të lehta deri në mesatare. Vranësirat do të shtohen gjatë pasdites.

Do të fryjë erë e lehtë deri në mesatare, kryesisht nga perëndimi. Temperaturat do të luhaten, me temperaturën minimale që do të jetë nga 4 deri në 10 gradë Celsius, ndërsa temperatura maksimale do të arrijë nga 24 deri në 30 gradë Celsius.

Në Shkup, pritet mot i ngjashëm, me diell dhe ngrohtë, por me vranësira mesatare gjatë pasdites. Do të fryjë erë e lehtë nga jugperëndimi. Temperatura minimale do të zbresë në 10 gradë, ndërsa ajo maksimale do të arrijë në 30 gradë Celsius.

Megjithatë, moti i qëndrueshëm nuk do të zgjasë. Të hënën pasdite, priten kushte për jostabilitet të izoluar. Ndërsa nga e marta, do të vijojë një periudhë me mot të ndryshueshëm, me vranësira dhe jostabilitet, shoqëruar me shi të rrëmbyeshëm lokal, bubullima dhe erë të fortë.

Në disa vende, do të ketë kushte për stuhi. Temperatura ditore do të pësojë një rënie graduale të lehtë.