Zjarri i madh që shpërtheu dje në Trubarevë, në depot që përmbajnë mbetje plastike dhe elektronike, u parandalua të përhapet falë veprimit të shpejtë dhe të koordinuar të zjarrfikësve të Shkupit. Sipas drejtorit të Drejtorisë për Mbrojtje dhe Shpëtim, Stojançe Angelov, katër objekte u shpëtuan nga veprimi i menjëhershëm, si dhe një sasi e madhe e mbetjeve plastike që nuk u përfshinë nga zjarri.

Aktualisht, zjarrfikësit po punojnë për të lagur rërën me të cilën janë groposur bateritë e litiumit, me qëllim shuarjen e plotë, duke qenë se ky lloj mbetjesh është jashtëzakonisht i vështirë për t’u shuar. Pavarësisht kësaj, ende ka tym që vjen nga poshtë rërës.

Njëkohësisht, rreth orës 2:30 të mëngjesit, ekipet nga brigada e zjarrfikësve të Shkupit intervenuan edhe në deponinë e Drisllës, ku u vunë re flakë. Sipas informacioneve, bëhej fjalë për avullim gazi dhe intervenimi i shpejtë parandaloi rrezikun që flakët të përfshijnë pjesën kryesore të deponisë.

Situata në Drislla është e qëndrueshme dhe po vazhdohet me groposjen agresive të pjesës së mbetur. Pjesa e djegur ditën e djeshme është mbuluar tashmë. Një pjesë e makinerisë u ridrejtua në Trubarevë për ndihmë.