Shkup – Partia Social Demokrate e Maqedonisë (SDSM) ka shprehur shqetësimin e thellë për vonesat e pagesave të punëtorëve publikë gjatë festave të Pashkëve, duke akuzuar qeverinë e VMRO-DPMNE-së për neglizhencë dhe shkelje të ligjit.

Kristina Kostova, nënkryetare e SDSM-së, deklaroi në një konferencë për shtyp se punëtorët në sektorë të ndryshëm si kultura, qendrat e punës sociale, inspektoratet shtetërore të punës dhe tregut, si dhe Ministria e Ekonomisë, janë lënë pa paga gjatë kësaj periudhe festive. Kjo, sipas saj, i vendos ata në një situatë të pasigurtë dhe zhgënjyese, duke mos patur mundësi të plotësojnë nevojat e tyre bazë.

Kostova theksoi se VMRO-DPMNE shkel në mënyrë flagrante ligjin për pagesën e pagave deri në datën 15 të muajit për muajin e kaluar. Ajo shtoi se një pagë nuk është shpërblim, por një e drejtë themelore e garantuar ligjërisht për çdo punëtor.

SDSM kërkoi nga qeveria të paguajë menjëherë pagat e punëtorëve në sektorin publik dhe të marrë përgjegjësi për këtë situatë. Sipas Kostovës, niveli i jetesës së punëtorëve është në fund, ndërsa çmimet dhe faturat rriten vazhdimisht. Ajo vuri në dukje se punëtorët maqedonas kanë pagat më të ulëta në rajon dhe qeveria refuzon çdo kërkesë për rritje të pagave.