Ministria e Bujqësisë, Pylltarisë dhe Ekonomisë së Ujërave (MBPUEU) ka njoftuar pagesën e 49,658,739 denarëve për 761 prodhues të orizit, për orizin e papërpunuar të dorëzuar te blerësit dhe/ose përpunuesit e regjistruar nga 1 tetori 2024 deri më 28 shkurt 2025.

Kjo pagesë lidhet me nën-masën 1.1 “Pagesat direkte për sipërfaqe bujqësore të punueshme për të gjitha kulturat e punueshme, bimët medicinale, aromatike dhe erëzore”, sipas MBPUEU-së. Shuma maksimale e orizit të papërpunuar e pranueshme për mbështetje financiare është 8,000 kilogramë për hektar të raportuar.

Përfitues të kësaj nën-mase janë fermat bujqësore që kanë paraqitur një kërkesë nën nën-masën 1.1 “Pagesat direkte për sipërfaqe bujqësore të punueshme për të gjitha kulturat e punueshme, bimët medicinale, aromatike dhe erëzore” nga Programi për mbështetje financiare në bujqësi për vitin 2024.

Këto ferma duhet të kenë mbjellë dhe korrur sipërfaqe me oriz dhe ta kenë dorëzuar prodhimin e realizuar te blerësit dhe/ose përpunuesit e regjistruar në periudhën nga 1 tetori 2024 deri më 28 shkurt 2025, të cilët janë të regjistruar në Regjistrin e Blerësve të Produkteve Bujqësore.

MBPUEU thekson se mbetet një partner i vërtetë i prodhuesve të orizit.