Një 59-vjeçar me iniciale R.Z. nga fshati Arnaki, komuna e Sarajit, u arrestua sot në mëngjes pasi u kap duke shkaktuar një zjarr pranë autostradës Shkup-Tetovë. Sipas Ministrisë së Punëve të Brendshme, policia u njoftua rreth orës 8:00 të mëngjesit se një person po ndezte zjarr në autostradën Shkup-Tetovë, pas stacionit të pagesës Glumovë.

Policia mbërriti në vendin e ngjarjes dhe konstatoi se R.Z. po ndezte mbeturina dhe bar të thatë pranë një stalle bagëtish. Zjarri u shua nga një ekip i Brigadës së Zjarrfikësve të Shkupit.

I dyshuari u arrestua menjëherë dhe u dërgua në stacionin policor. Autoritetet kompetente pritet të ngrenë padi ndaj tij pasi të dokumentohet plotësisht rasti.