Shkup – Ministri i Shëndetësisë, Arben Taravari, njoftoi se nëntë persona të lënduar nga zjarri në diskotekën “Puls” në Koçan po trajtohen në Shkup, ndërsa 48 të tjerë po marrin trajtim jashtë vendit.

Sipas Taravarit, dy pacientë janë në gjendje kritike, ndërsa të tjerët janë stabilë. Ai shtoi se nga 193 pacientë të shtruar pas aksidentit, aktualisht 57 janë ende në trajtim spitalor.

“Në Shkup janë nëntë pacientë, dy në Klinikën e Kirurgjisë Plastike në Qendrën Klinike, një pacient në ‘8 Shtatori’, katër pacientë në spitalin e qytetit të vjetër dhe dy pacientë në spitale private. Të gjithë janë në gjendje relativisht të mirë dhe të qëndrueshme. 48 pacientë po trajtohen jashtë vendit, njëri prej të cilëve presim të lirohet sot në shtëpi. Nga pacientët që po trajtohen jashtë vendit, vetëm dy janë ende në gjendje kritike. Të tjerët janë në rehabilitim ose në pritje të operacionit,” tha Taravari.

Ministri ndau lajmin e mirë se një pacient, i cili ishte rianimuar dy herë, tani është në gjendje të mirë dhe ka filluar të lëvizë.