Qeveria e Maqedonisë së Veriut po shqyrton mundësitë për ndërtimin e një kompleksi të ri panairi në Shkup, me qëllim të ringjalljes së aktivitetit ekonomik dhe forcimit të profilit rajonal dhe ndërkombëtar të vendit.

Drejtori i Shërbimit për Çështje të Përgjithshme dhe të Përbashkëta, Ivica Tomovski, zhvilloi një takim pune me përfaqësues të “Panairit të Shkupit”, ku u diskutua nevoja dhe rëndësia e ndërtimit të një kompleksi të ri panairi.

Në takim u shqyrtuan mundësitë për lokacionin, kushtet e infrastrukturës dhe risitë që do ta bënin hapësirën e re të panairit konkurruese në tregjet rajonale dhe ndërkombëtare.

Daniela Gligorovska, Drejtore e “Panairit të Shkupit”, theksoi përfitimet e ringjalljes së aktivitetit të panairit, i cili nuk është mbajtur në ambientet e veta për disa vite. Ajo shtoi se panairët janë ngjarje kyçe për promovimin e produkteve dhe shërbimeve maqedonase, si dhe për krijimin e mundësive të reja për investime dhe bashkëpunim të huaj.

Tomovski theksoi se rikthimi i “Panairit të Shkupit” në ambientet e tij do të ringjallë aktivitetin ekonomik dhe do të forcojë profilin rajonal dhe ndërkombëtar të Maqedonisë së Veriut si një qendër e rëndësishme tregtare dhe biznesi.

Gjatë takimit u ra dakord që bashkëpunimi dhe mbështetja ndërinstitucionale të vazhdojë në periudhën e ardhshme për të shqyrtuar në detaje të gjitha aspektet dhe mundësitë për ndërtimin e një objekti të ri për nevojat e ngjarjeve të panairit.