Ministria e Vetëqeverisjes Lokale ka siguruar pajisje të teknologjisë informative (IT) për të gjitha tetë Qendrat për Zhvillimin e Rajoneve të Planifikimit, falë mbështetjes nga Qeveria Zvicerane. Ky investim synon të përmirësojë kapacitetet e këtyre qendrave dhe të rrisë efikasitetin e shërbimeve që ato ofrojnë për qytetarët.

Dorëzimi simbolik i pajisjeve u realizua sot në Ministrinë e Vetëqeverisjes Lokale. Drejtuesit e qendrave theksuan se pajisjet e reja do të lehtësojnë aksesin e shpejtë dhe efikas në informacion dhe do të mbështesin përpjekjet për zhvillim të qëndrueshëm në të gjitha rajonet e vendit.

Pajisjet e siguruara përfshijnë laptopë, kompjuterë personalë, monitorë, printerë multifunksionalë dhe sisteme NAS. Ato janë tërësisht të përshtatura për nevojat e Qendrave për Zhvillimin e Rajoneve të Planifikimit.

Vlera totale e këtij donacioni është 1,295,500.00 denarë (MKD) dhe pritet të ketë një ndikim pozitiv të drejtpërdrejtë në funksionimin e këtyre institucioneve.

Ministria thekson se ngritja e qendrave të forta dhe të pajisura mirë paraqet bazën për rritje dhe zhvillim të vazhdueshëm, gjë që do të përmirësojë kushtet e jetesës për të gjithë qytetarët, veçanërisht ata në rajonet më pak të zhvilluara. Projekti është realizuar në kuadër të fazës së dytë të projektit “Zhvillimi i Balancuar Rajonal i Qëndrueshëm dhe Gjithëpërfshirës”.