Ministri i Shëndetësisë, Arben Taravari, ka deklaruar se të gjithë ata që kanë gabuar, përfshirë mjekët, duhet të mbajnë përgjegjësi pas aksionit policor të djeshëm që zbuloi një rrjet prej 50 personash që, me diagnoza të rreme, siguronin kompensime për kujdestari dhe pensione invaliditeti për të tjerët. Ai e bëri këtë deklaratë gjatë vizitës së tij në spitalin e Kumanovës.

Taravari theksoi se ai personalisht ka ndërmarrë veprime ndaj një zyrtari të përfshirë në skandal. Ai tha se personi në fjalë, një drejtor i Geriatrisë dhe anëtar i partisë së tij, u shkarkua nga posti i tij dhe u përjashtua nga partia pas zbulimit të përfshirjes së tij.

Ministri shprehu mbështetjen e tij për aksionet e tilla duke shtuar se ai ka informacion për ekzistencën e mjekëve të tillë, por nuk dëshiron të gjeneralizojë, dhe se Ministria e Shëndetësisë është e gatshme të ndihmojë në zbardhjen e krimeve dhe korrupsionit.

Aksioni i djeshëm i Byrosë së Sigurisë Publike u zhvillua në disa qytete të vendit dhe synonte luftën kundër krimit të organizuar dhe korrupsionit në sistemin shëndetësor. Rrjeti i 50 personave përfshinte mjekë, një anëtar të komisionit në Fondin e Sigurimit Pensional dhe Invalidor (PIOM), një avokat, një ekspert dhe një menaxher i një byroje konsulence.

Gjatë aksionit, u kryen kontrolle në ordinanca mjekësore, një zyrë avokatie dhe zyra zyrtare ku punonin mjekët e dyshuar, konkretisht në Qendrën Klinike “Nënë Tereza” në Shkup, në Spitalin Klinik të Tetovës dhe në Spitalin e Përgjithshëm të Velesit.

Personat e dyshuar akuzohen për lidhje kriminale, shpërdorim të pozitës dhe autoritetit zyrtar, ndihmë dhe nxitje, marrje ryshfeti, dhënie ryshfeti, marrje shpërblimesh për ndikim të paligjshëm dhe dhënie shpërblimesh.