Ministri i Shëndetësisë, Arben Taravari, ka deklaruar se do të ketë përgjegjësi nëse konstatohen mangësi në rastin e vdekjes së pacientit Toni Angelovski, i cili ndërroi jetë me aortë të çarë duke pritur operacion në Klinikën e Kirurgjisë Kardiake.

Taravari tha se ende nuk e ka parë raportin e komisionit ekspert, por theksoi se do të kërkojë sqarime të menjëhershme dhe një analizë të detajuar të ngjarjes. Ai shtoi se sipas informacioneve të tij, vetëm një sallë operacioni ishte funksionale në atë kohë, por kërkoi kohë për të shqyrtuar raportin zyrtar.

Familjarët e Angelkovskit, 59-vjeçar, kanë pohuar se ai nuk u operua sepse klinika u kishte thënë se nuk kishte salla operacioni të lira. Ata ishin referuar në spitale private, ku u thanë se kuota ishte e plotë deri në qershor. Megjithatë, spitalet private i ftuan ata ta sillnin pacientin për ta stabilizuar, por për shkak se nuk kishin pjesën e nevojshme, procedura nuk mund të kryhej menjëherë.

Nga ana tjetër, Klinika e Kirurgjisë Kardiake pretendon se pacienti është trajtuar menjëherë dhe ka marrë terapinë e nevojshme, duke arritur një stabilizim të gjendjes. Pas shqyrtimit të të gjitha gjetjeve, bordi mjekësor ka përcaktuar se nëse do të kryhej trajtim kirurgjik i hapur, shanset e pacientit për mbijetesë do të ishin jashtëzakonisht të vogla, gjë që iu shpjegua familjes. Nga klinika konfirmojnë se salla e dytë e operacionit ka qenë jashtë funksioni për më shumë se një muaj për shkak të instalimit të një pajisjeje të re, që kërkon edhe përshtatjen e hapësirës.

Në fund, familjes iu rekomanduan dy spitale private, si dhe trajtim jashtë vendit.