Shkup – Zëvendëskryeministri i Parë dhe Ministri i Mjedisit dhe Planifikimit Hapësinor, Izet Mexhiti, u takua sot me Ambasadoren e Shteteve të Bashkuara të Amerikës në Maqedoninë e Veriut, Angela Ageler, për të diskutuar bashkëpunimin teknik dhe shkencor për mbrojtjen e Liqenit të Ohrit.

Gjatë takimit miqësor, të dy zyrtarët theksuan rëndësinë e mbrojtjes së këtij thesari natyror dhe kulturor të përbashkët midis Maqedonisë së Veriut dhe Shqipërisë. Bashkëpunimi synon përmirësimin e cilësisë së ujit, menaxhimin e rezervave të peshkut dhe zhvillimin e turizmit të qëndrueshëm liqenor.

Në vitin 2024, dy ekspertë amerikanë kryen vizita në terren dhe takime dy-javore në rajonin e Ohrit për të vlerësuar situatën aktuale. Raporti nga ajo vizitë përmban disa rekomandime specifike, duke përfshirë forcimin e kapaciteteve të Institutit Hidrobiologjik përmes modernizimit dhe mbështetjes së stafit shkencor, krijimin e një programi kombëtar afatgjatë për monitorimin limnologjik dhe rezervat e peshkut, zhvillimin e një plani të përbashkët ndërkufitar për menaxhimin e inkubatorëve dhe mbrojtjen e troftës së Ohrit, krijimin e mekanizmave për zbulimin e hershëm të specieve invazive, si dhe zhvillimin e një programi kërkimor për turizmin e qëndrueshëm dhe forcimin e rolit të organizatave civile.

Në takim mori pjesë edhe Profesor Jason Stockwell, drejtor i Laboratorit të Shkencave Mjedisore dhe Burimeve Natyrore në Universitetin Shtetëror të Vermontit, SHBA, i cili do të qëndrojë në Ohër në ditët në vijim, pas së cilës do të prezantojë idetë e tij për bashkëpunim të mëtejshëm me Institutin Hidrobiologjik – Ohër dhe institucione të tjera relevante në vend.

Mexhiti dhe Ageler u pajtuan që mbrojtja e Liqenit të Ohrit është prioritet kombëtar dhe ndërkufitar, dhe bashkëpunimi me SHBA dhe partnerët ndërkombëtarë do të sjellë ekspertizën e nevojshme për të ruajtur këtë trashëgimi unike natyrore dhe kulturore.