Qeveria e Maqedonisë së Veriut ka miratuar Marrëveshjen për Partneritet Strategjik me Mbretërinë e Bashkuar, e cila pritet të nënshkruhet të enjten në Londër. Marrëveshja, e cila synon të mbështesë realizimin e projekteve infrastrukturore në sektorë kyç si shëndetësia, transporti, teknologjia, energjia dhe transformimi digjital, konsiderohet si marrëveshja më e madhe që Maqedonia ka arritur ndonjëherë me një vend tjetër.

Zëvendëskryeministri dhe Ministri i Transportit, Aleksandar Nikoloski, deklaroi se Mbretëria e Bashkuar po vë në dispozicion 5 miliardë paund, ose 6 miliardë euro, përmes Instrumentit të Financimit të Eksporteve (UKEF), për financimin e projekteve në Maqedoni. Nikoloski theksoi se ky është financim i dedikuar ekskluzivisht për zbatimin e projekteve dhe se qeveria do të bashkëpunojë me Mbretërinë e Bashkuar për të mobilizuar fonde të tjera.

Delegacioni qeveritar i Maqedonisë së Veriut, i udhëhequr nga Nikoloski, do të vizitojë Londrën këtë javë për të finalizuar marrëveshjen. Pjesë e delegacionit do të jenë edhe Zëvendëskryetarja e Qeverisë dhe Ministrja e Mjedisit, Izet Mexhiti, Ministrja e Arsimit, Vesna Janevska, Drejtori i NP për Infrastrukturën Hekurudhore, Sinisha Ivanovski, si dhe bashkëpunëtorë të tjerë. Gjatë vizitës, delegacioni do të zhvillojë takime me Ministrin e Brendshëm dhe Ministrin e Mbrojtjes së Mbretërisë së Bashkuar, si dhe me përfaqësues të Instrumentit të Financimit.

Nikoloski e cilësoi nënshkrimin e marrëveshjes si një moment historik dhe një datë që do të kujtohet gjatë në historinë e Maqedonisë së Veriut. Ai theksoi se Mbretëria e Bashkuar është një aleat kyç perëndimor dhe se partneriteti me të tregon orientimin pro-perëndimor të vendit dhe respektin për vlerat euro-atlantike. Ai shprehu gjithashtu kënaqësinë që Mbretëria e Bashkuar ka arritur një marrëveshje me BE-në, duke e vlerësuar këtë si një sinjal pozitiv për bashkëpunimin e Maqedonisë së Veriut me tre aleatët e saj kyç: BE-në, Mbretërinë e Bashkuar dhe SHBA-në. Nikoloski njoftoi se do të ketë një takim edhe me drejtorin e Ryanair, nga i cili pret linja të reja fluturimi për në Shkup.