Partia politike Levica ka njoftuar se nuk do ta mbështesë ligjin e propozuar për energjinë, duke argumentuar se ky ligj përfaqëson një hap tjetër drejt liberalizimit të plotë të sektorit strategjik të energjisë. Sipas tyre, shteti po braktis rolin e tij kyç në mbrojtjen e interesit publik.

Në një deklaratë për media, Levica shprehet se projektligji thellon procesin e liberalizimit të tregut dhe tregon qartë se shteti nuk ka asnjë qëllim apo plan për të nacionalizuar kapacitetet energjetike dhe për t’i vënë ato në shërbim të popullit.

Partia paralajmëron se hapja e tregut ndaj operatorëve privatë vendas dhe të huaj, të motivuar ekskluzivisht nga fitimi, do të rezultojë në çmime më të larta për qytetarët, dallime më të mëdha sociale dhe një ulje të cilësisë së shërbimeve. Sipas Levica-s, eksperiencat nga vende të tjera konfirmojnë se ky trend çon në një rritje të jashtëzakonshme të çmimeve të energjisë elektrike dhe një dobësim të drejtësisë sociale.

Për të zbutur ato që i quajnë aspektet më të dëmshme të ligjit të propozuar, Levica ka dorëzuar një set amendamentesh.

Këto amendamente synojnë rritjen e transparencës dhe kontrollit mbi Komisionin Rregullator të Energjisë, mbrojtjen më të mirë të konsumatorit në matje, faturim dhe inkasim, si dhe futjen e sanksioneve reale dhe efektive për shkelësit.

Ndër dobësitë kryesore të ligjit, Levica thekson gjithashtu mungesën e mekanizmave për monitorimin dhe shkarkimin e Komisionit Rregullator, mundësinë e lëshimit të faturave me të dhëna të paverifikuara dhe penalitetet e ulëta, të cilat, sipas tyre, stimulojnë mosrespektimin e detyrimeve ligjore.

Partia i bën thirrje Parlamentit të rivendosë kontrollin shtetëror mbi sektorin e energjisë, të sigurojë funksionim të drejtë dhe transparent, si dhe të mbrojë qytetarët nga ndikimi ekonomik i privatizimit.

“Ne do të vazhdojmë të kundërshtojmë në mënyrë konsistente çdo përpjekje për të privatizuar të mirat publike, për të liberalizuar sektorët strategjikë dhe për të minuar sovranitetin shtetëror,” tha Levica.