Në vendbanimin Inxhikovë të Komunës së Gazi Babës do të ndërtohet një kopsht i ri për fëmijë, falë financimit nga buxheti i shtetit. Projekti është pjesë e thirrjes së parë qeveritare për mbështetjen e projekteve infrastrukturore komunale.

Kryeministri Hristijan Mickoski, Ministri i Vetëqeverisjes Lokale, Zlatko Perinski, Ministri i Politikës Sociale, Demografisë dhe Rinisë, Fatmir Limani, dhe Kryetari i Komunës, Boban Stefkovski, vizituan sot ambientet ku po zhvillohen punimet.

Sipas kryetarit Stefkovski, kopshti do të shtrihet në një sipërfaqe prej 490 metrash katrorë dhe do të jetë një ndërtesë njëkatëshe me lartësi 3 metra. Ai do të përfshijë tre dhoma lojërash dhe ambiente të tjera ndihmëse.

Kapaciteti i kopshtit do të jetë 48 fëmijë, ku 36 do të jenë mbi moshën 2 vjeç dhe 12 do të jenë deri në 2 vjeç.

Ministri Perinski theksoi se projekti synon përmirësimin e kushteve për më të vegjlit dhe se Komuna e Gazi Babës ka përfituar rreth 190 milionë denarë nga thirrja e parë publike. Ai shtoi se në periudhën e ardhshme, qytetarët mund të presin një bum ndërtimi që do të përmirësojë ndjeshëm kushtet infrastrukturore.

Ministri Limani njoftoi se pritet të fillojnë punën më shumë se 10 kopshte gjatë këtij viti, të cilët do të akomodojnë mbi 1,500 fëmijë. Po ashtu, po përgatiten ose janë në ndërtim edhe 15 kopshte të tjera.

Kryeministri Mickoski theksoi se ndërtimi i këtij kopshti është në drejtim të përmirësimit të kushteve për fëmijët dhe se kjo është një nga parakushtet për demografi më të mirë dhe më shumë fëmijë.