Gjatë kontrolleve të intensifikuara të trafikut të zhvilluara dje në të gjithë vendin, policia ka lëshuar 777 urdhër pagesa për shkelje të ndryshme të rregullave të qarkullimit rrugor. Aksioni u zhvillua nga oficerë policie nga të gjitha tetë sektorët për punë të brendshme brenda Byrosë së Sigurisë Publike të Ministrisë së Punëve të Brendshme.

Sipas të dhënave të publikuara, shkeljet më të shpeshta kanë qenë parkimet e parregullta, me 256 raste të evidentuara. Pas tyre renditen shkeljet e shpejtësisë, ku u konstatuan 175 raste të drejtimit të automjetit me shpejtësi më të madhe se ajo e lejuar.

Policia gjithashtu regjistroi 69 pjesëmarrës në trafik që nuk posedonin patentë shoferi. Në nëntë raste, shoferët u kapën duke drejtuar automjetin nën ndikimin e alkoolit, ndërsa gjashtë shoferë kaluan në dritë të kuqe. Përveç kësaj, 25 këmbësorë u sanksionuan për shkelje të ndryshme.

44 urdhër pagesa u lëshuan për mosvendosjen e rripit të sigurimit, ndërsa 11 drejtues motoçikletash u sanksionuan për mosmbajtjen e kaskës mbrojtëse. Gjithashtu, u lëshuan 28 urdhër pagesa për përdorimin e telefonit celular gjatë drejtimit të automjetit.

Gjithsej, 22 automjete u përjashtuan nga qarkullimi, prej të cilave tetë ishin teknikisht të pa sakta dhe 14 ishin të pa regjistruara.

Ministria e Punëve të Brendshme ka njoftuar se kontrolli i trafikut do të vazhdojë edhe në ditët në vijim. Autoritetet u bëjnë thirrje qytetarëve të respektojnë rregullat dhe rregulloret e trafikut me qëllim rritjen e sigurisë në trafik dhe të kontribuojnë së bashku për rrugë më të sigurta.