Një operacion i gjerë policor u zhvillua sot në Shkup nga Ministria e Brendshme, ku u arrestuan katër persona të dyshuar si pjesë e grupit kriminal “Belanoca-Baron”. Aksioni, i koduar “Bunker”, rezultoi me bastisje në pesë lokacione të ndryshme në kryeqytet.

Sipas Prokurorisë Publike, të arrestuarit dyshohen për “Pjesëmarrje në organizatë kriminale” dhe “Vrasje”, ndërsa njëri prej tyre akuzohet edhe për “Prodhimi dhe shpërndarja e paautorizuar e narkotikëve, substancave psikotrope dhe prekursorëve”. Gjatë bastisjeve, në banesën e njërit prej të dyshuarve u gjet një sasi e madhe marijuane, e cila do t’i nënshtrohet analizave.

Hetimet e vitit 2023 zbuluan se të dyshuarit ishin bërë pjesë e një grupi që vepronte prej kohësh, me qëllim kryerjen e krimeve si “Vrasje për hakmarrje” dhe “Vrasje me pagesë”, për të cilat parashikohet dënimi me burg të paktën dhjetë vjet ose burgim i përjetshëm. Ata dyshohet se siguronin kushte dhe mjete për ekzekutimin e urdhrave për vrasje.

Në korrik të vitit 2023, tre nga të dyshuarit, të inkurajuar dhe urdhëruar nga një organizator i grupit, vëzhguan vendndodhjen e një viktime në territorin e Maqedonisë dhe Greqisë, duke siguruar burime për kryerjen e krimit. Gjatë kësaj periudhe, një anëtar i grupit rival të organizuar kriminal “Grkec” u vra në Greqi.

Në maj të vitit 2024, para një ndërtese në të ashtuquajturën rrugë plastike, dy të dyshuar kryen vrasjen e një personi. Gjatë largimit nga vendi i ngjarjes, ata qëlluan në një automjet të parkuar aty pranë, duke plagosur persona të tjerë, njëri prej të cilëve ndërroi jetë.

Duke marrë parasysh se janë plotësuar kushtet, prokurori publik kompetent do t’i paraqesë gjyqtarit të procedurës paraprake në Gjykatën Penale Themelore Shkup një propozim për caktimin e masës së paraburgimit për tre nga të dyshuarit, ndërsa për një të dyshuar do të propozohen masa të kujdesit.