Zjarri në deponinë Drisla në Shkup vazhdon të digjet, duke shkaktuar shqetësime të mëdha për shëndetin e banorëve dhe ndotjen e ajrit. Kaja Shukova, kandidate për kryetare të Shkupit nga radhët e LSDM-së, ka kritikuar ashpër qeverisjen e VMRO-DPMNE-së për menaxhimin joadekuat të mbetjeve në Drisla, duke e konsideruar atë si shkakun kryesor të zjarreve të vazhdueshme.

Shukova theksoi se në katër vitet e fundit, nuk është bërë trajtimi i duhur i mbetjeve, duke munguar mbushja me dhe dhe kompaktimi i mbetjeve, që ndihmon në uljen e vëllimit dhe eliminimin e oksigjenit, faktor kyç për parandalimin e djegies spontane.

Ajo shpjegoi se procesi i duhur përfshin mbulimin e përsëritur derisa mbetjet të jenë të mbyllura, duke parandaluar hyrjen e oksigjenit dhe lagështisë. Përveç kësaj, gazrat që mund të shkaktojnë shpërthime nuk trajtohen siç duhet, duke munguar kontrolli dhe djegia e kontrolluar e tyre.

Sipas Shukovës, shuarja e zjarrit me ujë krijon një problem tjetër, atë të ndotjes së lumit Markova, pasi gjithçka që rrjedh nga deponia përfundon në lumë. Ajo theksoi se situata aktuale tregon se struktura e udhëhequr nga VMRO-DPMNE është e paarsimuar dhe e pakualifikuar për të mbrojtur qytetarët dhe për të ofruar zgjidhje të përshtatshme.

Shukova ka deklaruar se ka një plan për të vendosur një sistem të duhur të menaxhimit të mbetjeve dhe për të parandaluar katastrofa të tilla ekologjike. Zgjidhja e saj përfshin trajtimin e duhur dhe mbi të gjitha, reduktimin e sasisë së mbetjeve përmes ndarjes dhe ripërdorimit.