Tetovë, Maqedoni e Veriut – Ish-drejtorët e Spitalit Klinik të Tetovës, Florin Besimi dhe Artan Etemi, janë dënuar me 1 vit e 6 muaj burg për shkak të zjarrit tragjik që shkrumboi spitalin modular. Vendimi u mor pas rigjykimit të çështjes.

Gjithashtu, Spitali Klinik i Tetovës është urdhëruar të paguajë një gjobë prej 1 milion denarësh.

Ky është vendimi i dytë në lidhje me këtë rast. Vendimi i parë kishte dënuar drejtorët Besimi dhe Etemi me dënim me kusht, por ai u rrëzua nga Gjykata e Apelit në Gostivar.

Prokuroria kishte kërkuar dënim me burg, duke theksuar përgjegjësinë e drejtorëve për mosrespektimin e rregulloreve të sigurisë nga zjarri.

Zjarri në spitalin modular ndodhi më 8 shtator 2021, duke shkaktuar vdekjen e 14 personave. Ngjarja shokoi opinionin publik dhe nxiti debate të ashpra mbi sigurinë e spitaleve modulare dhe përgjegjësinë e zyrtarëve.