Kuvendi i Republikës së Maqedonisë së Veriut do të debatojë sot për interpelancën e Ministrit të Punëve të Brendshme, Pançe Toshkovski, të parashtruar nga grupi parlamentar i Levica. Seanca plenare është caktuar të fillojë në orën 11:00.

Levica e ka dorëzuar interpelancën më 14 prill, duke argumentuar se Toshkovski nuk e ka kryer në mënyrë adekuate funksionin e tij, duke vepruar në mënyrë joprofesionale, të paskrupullt dhe të papërgjegjshme, gjë që ka rezultuar në një sërë veprimesh të paligjshme, skandalesh dhe ndryshimeve të personelit në Ministrinë e Punëve të Brendshme.

Sipas Levica-s, interpelanca bazohet në dhjetë arsye, pesë prej të cilave lidhen drejtpërdrejt me aksidentin tragjik në Koçan, ku humbën jetën 62 persona dhe u lënduan gati 200 të tjerë. Partia pretendon se Ministria e Punëve të Brendshme gjithashtu dështoi në faktin që zyrtarë dhe funksionarë afër VMRO-DPMNE-së nuk u përfshinë në hetim për një periudhë të gjatë kohore.